სამოქმედოდ რა ვარიანტები აქვს ფედრეზერვს

ყოველკვირეული ფუნდამენტალური ანალიზი
სამოქმედოდ რა ვარიანტები აქვს ფედრეზერვს

ფედრეზერვმა თავისი ექსტრაორდინარული გადაწყვეტილებებით, შეერთებული შტატების ეკონომიკის მკვეთრი ვარდნის შეჩერება შეძლო. უფრო მეტიც, გლობალური ბაზარი კრახს გადაარჩინა.

ცენტრალური ბანკი, ამას ძირითადად აქტივების პრაქტიკულად განუსაზღვრელი მოცულობით შესყიდვით ახერხებს. ეს კი მის ხელთ არსებული აქტივების სწრაფ ზრდას იწვევს, რაც დიდი ფინანსური კრიზისის დროსაც კი წარმოუდგენელი იყო. თქმა არ უნდა, რომ ფედრეზერვში უკვე ფიქრობენ იმაზე, თუ რა უნდა გააკეთონ იმისათვის, რომ ცენტრალური ბანკის ხელთ არსებული აქტივები, რაც შეიძლება უმტკივნეულად გამოიტანონ ბაზარზე.

ასევე აქტუალური თემაა სტიმულირების პროგრამის ვადები და მისი დასრულება, რაც ადრე თუ გვიან, გასაკეთებელი იქნება. მითუმეტეს, ეკონომიკის გახსნის შემდეგ, მისი აღდგენის პროცესი სწრაფად მიმდინარეობს. მეორე ტალღის მოლოდინის მიუხედავად, ანალიტიკოსები დამაიმედებელ პროგნოზებს აკეთებენ. ივნისის მონაცემები აჩვენებს, რამდენად სწრაფი აღდგენაა შესაძლებელი.

ნებისმიერ შემთხვევაში, ცენტრალური ბანკის ამოცანაა, მოვლენათა ოპტიმისტური განვითარების შემთხვევისთვისაც მზად იყოს. და ეჭვსგარეშეა, ფედრეზერვში ამაზე მსჯელობა დაწყებული იქნება. რა თქმა უნდა, ფედრეზერვი სიტუაციის გაუარესების სცენარებს და შესაბამის სამოქმედო გეგმებსაც ამზადებს.

თავისი ბოლო სხდომის შემდეგ, ფედრეზერვმა პესიმისტური პროგნოზი გამოაქვეყნა. შესაძლოა, ამის მიზეზი ისაა, რომ მონეტარული პოლიტიკის კომიტეტს სურს, რომ ყველა გამოწვევისთვის მზად იყოს და შესაბამისი სამოქმედო გეგმაც შემუშვებული ჰქონდეს. ამასთან, ფედრეზერვი კვლავ ეცდება უარყოფითი განაკვეთის შემოღებისგან თავის არიდებას. მისთვის უკეთესი საშუალება, რაოდენობრივი შემსუბუქებაა (QE), რომელიც წარმატებით არაერთხელ გამოიყენა.

და მაინც, თუ ფედრეზერვი გადაწყვეტს, რომ ეკონომიკას მეტი სტიმულირება სჭირდება, მის არსენალში შეიძლება უარყოფითი განაკვეთი ვიხილოთ. ამ საშუალებას უკვე იყენებენ იაპონიის ბანკი და შვეიცარიის ეროვნული ბანკი. თუმცა მისი ეფექტურობა ბევრისთვის სადაოა. მთავარი ეფექტი, დოლარის გაუფასურება იქნება, რასაც ექსპორტის წახალისება შეუძლია, თუმცა უარყოფითი ეფექტებიც აქვს და განსაკუთრებით, კომერციულ ბანკებს აზარალებს.

მეორე საშუალებაა ბონდების მომგებიანობის ტეხილის კონტროლი. ამ მეთოდს ფედრეზერვი ეფექტურად იყენებს, როცა გრძელვადიან ბონდებს ყიდულობს. ამით კლებულობს ასეთი ბონდების მომგებიანობა და ტეხილიც გლუვი ხდება. მესამე ვერსია კი არის QE. როგორც ანალიტიკოსები ამბობენ, QE-ს ნაკლებად შეუძლია რეცესიის გამოწვევა.

ამ ეტაპზე არ არსებობს ზუსტი ცნობა იმაზე, თუ რა მოცულობით აქტივებია დაგროვილი ფედრეზერვის ხელში. ბოლო მონცემებით, ამ აქტივების ღირებულება 7.1 ტრილიონ დოლარს აღწევდა. სტიმულირების პროგრამის დასასრულს კი ის ალბათ 10 ტრილიონ დოლარამდე გაიზრდება. ფედრეზერვისთვის, ეს მიმოქცევაში დამატებითი ნაღდი ფულის გამოშვების საშუალებაა.

ადრე თუ გვიან, ეკონომიკის აღდგენის კვალობაზე, აქტივების შესყიდვა დასრულდება. ბოლოს, როცა ეს მოხდა, ბაზარმა დოლარზე მოთხოვნა გაზარდა. ეს კი ფედრეზერვს არ აწყობს, რადგან დოლარის სწრაფ გამყარებას, ეკონომიკისთვის უარყოფითი ეფექტები მოჰყვება. ამიტომ, ცენტრალურ ბანკს მოსაფიქრებელი აქვს, როგორ შეწყვიტოს/შეანელოს სტიმულირების პროგრამა ისე, რომ ამით დოლარის გამყარება არ გამოიწვიოს.