ამერიკული სახაზინო ბონდების მომგებიანობა ნულისკენ მიექანება

ყოველკვირეული ფუნდამენტალური ანალიზი
ამერიკული სახაზინო ბონდების მომგებიანობა ნულისკენ მიექანება

ფედრეზერვის მიერ, დოლარზე განაკვეთის ნახევარი პროცენტით შეკვეცის და იმ მოლოდინის ფონზე, რომლის შესაბამისადაც, ბაზარი ამის გამეორების მოლოდინშია, დოლარიც პოზიციებს ფლობს და აშშ-ის სახაზინო ბონდების მომგებიანობაც რეკორდულად დაბალ დონეზე ეცემა.

იმის ფონზე, რომ მეცნიერთა განცხადებით, კორონავირუსის სამკურნალო ვაქცინა ბაზარზე თვეების შემდეგ გამოვა, ინვესტორები ფედრეზერვისგან დოლარზე განაკვეთის კიდევ ერთხელ შეკვეცის მოლოდინში არიან. ამ მოლოდინს ის გარემოებაც აძლიერებს, რომ მსოფლიოში ინფიცირებულთა რიცხვი 100 ათასს ასცდა.

ეს კი ფედრეზერვისთვის ამჟამად მთავარი რისკია. სწორედ ამის გამო გადაწყდა საგანგებო სხდომაზე განაკვეთის შემცირება. უფრო მეტიც, ცენტრალური ბანკის მონეტარული პოლიტიკის ჯგუფის წევრები არ გამორიცხავენ, რომ მარტის სხდომაზე კიდევ შეკვეცავენ განაკვეთს. ეს კი ბაზრის მოთამაშეებს დოლარის საწინააღმდეგოდ განაწყობს. ამ სიტუაციაში კი სახაზინო ბონდების მომგებიანობაც რეკორდულად დაბალ მაჩვენებლებამდე ეცემა.

ხუთწლიანი ბონდების მომგებიანობა 0.5339 პროცენტამდე დაეცა, რაც 2012 წლის მინიმუმზე დაბალი მაჩვენებელია. არნახულად დაბალ დონემდე - 0.6932 პროცენტამდე დაეცა 10-წლიანი ბონდების მომგებიანობა, თუმცა შემდეგ 0.76-მდე გაიზარდა. 1.2742 პროცენტამდე არის შემცირებული 30-წლიანი ბონდების მოგების განაკვეთი, რაც ასევე რეკორდულად დაბალი მაჩვენებელია. ამის კვალობაზე, მკვეთრად გაიზარდა მოთხოვნა არაამერიკულ რისკებისგან თავშესაფარ აქტივებზე, როგორებიცაა იაპონური იენი და შვეიცარიული ფრანკი.

ამ ორმა ვალუტამ ახალი კვირაც ზრდით დაიწყო. კორონვირუსის ფაქტორის გარდა, მათზე მოთხოვნას საუდის არაბეთის განცხადებამაც შეუწყო ხელი, რომელიც ირიბად ისევ ამ ვირუსს უკავშირდება. საქმე ისაა, რომ ნავთობზე მოთხოვნის კლების კვალობაზე, საუდთის ინციატივით, OPEC-ის (ნავთობის ექსპორტიორი ქვეყნების ორგანიზაცია) წევრები ბაზარზე მიწოდების შეკვეცაზე შეთანხმდნენ, მაგრამ ამის წინააღმდეგ რუსეთი წავიდა. პასუხად, საუდის არაბეთმა გამოაცხადა, რომ მკვეთრად გაზრდის ნავთობის მოპოვებას და შეთავაზებას, რასაც ნავთობის ფასის ვარდნა და ინვესტორებისთვის, რისკის კიდევ ერთი ძლიერი ფაქტორის გაჩენა მოჰყვა.

ენერგომატარებლებზე ფასების ვარდნა, ინფლაციაზე უარყოფითად იმოქმედებს, რაც ცენტრაური ბანკებისთვის, მონტარული პოლიტიკის შერბილების საბაბია. ინვესტორთა მოლოდინიც იმისა, რომ ფედრეზერვი განაკვეთს მალე კიდევ ნახევარ პროცენტს მოაკლებს და ზაფხულში ამას 25 საბაზისო პუნქტით შეკვეცას მოაყოლებს, სულ უფრო იზრდება. ეს კი დოლარის კურსზე და სახაზინო ბონდების მომგებიანობაზე უარყოფითად აისახება.